مونيكا ملاك جوه قلبي

في يوم سمعت خبر وحش اوي اني في شوية شباب الاتوبيس اتقلب بيهم ومات منهم كتير واتصاب اكتر
المهم بعد الموضوع ده سمعت عن بنت اسمها مونيكا هي طالبة في مدرسة الاباء اليسوعين في المنيا
كانت محور احزان نس كتيرة والكل حزين عليها انا قلت يمكن دول اصحابها وحقهم يزعلوا .. ربنا يقويهم بكرة ينسوا

تعدي الايام والشهور والاقي صورة البنت دي في كل مكان .. الناس بتحكي عليها في كل الاوقات .. الكل فاكرها .. كل الناس شالت صورها وحطيت صورتها علي بروفايلتهم بنات وصبيان كانوا بيعملوا كده

ايه ده يا ناس في حد الناس بتحبه بالشكل ده

تعدي ايام اكتر وشهور اكتر
والناس فاكرة البنت دي كأنها عايشة وبيتكلموا عليها كانها جوة روحهم

في مرة قررت اعرف اخبار عن البنت دي من غير ما اسأل
لان كانت لما بتيجي سيرتها بلاقي الحزن والدموع في عيون كل حبايبها

لحد مقررت في يوم اني اجمع الصور بتاعت البنت دي
لاني كنت بلاقيها في كل الصور بتضحك من قلبها

عارف الضحكة الي سنانك بتبان فيها من كتر البرائة

هي دي مونيكا

قلب ابيض , سعاده في كل مكان , حب يملا الدنيا . تشوفها تتفائل , روحك متعلقة بيها .
الضحكة ما بتفارقش وشها و تبص في وشها تلاقي حنية من كل مكان قلب خايف علي حب الناس اكتر من روحه

ده اللي كنت بسمعه عنها
عمري ما ندمت قد ندمي اني ما اتعرفتش عليها

مرة قريت نوت حد كان كتبها عنها مليت قلبي وروحي
عيطت لما شبعت علي فراقها
وبعدين افتكرت اني عمري ما عرفتها

حبيتها بعد ما عمرها خلص وراحت لربها
ربنا يرحمك يا مونيكا وتفضل الناس فاكراكي علطول بالخير

انا هحبك زيهم بالظبط لانك بقيت ملاك جوه قلبي

يا تري لو مت الناس هتفتكرني زي ما هي فاكراها كده

ربنا يرحمها يا رب

عشان يبقي عندي حرية

يعني ايه حرية ؟؟
يعني ايه نحترم الحريات ؟؟

من واقع اختلاطي بعالم الفيس بوك والمدونات وعالم وسط البلد والفنانين عرفت منهم حاجات كتير ومفاهيم جديدة ليها علاقة بالحرية كان عمري ما سمعت عنها ولا حتي خدتها في المدرسة

في الحقيقة انا بقالي سنتين علي الفيس بوك وبقالي 4 سنين في وسط البلد وطول الوقت ده بسمع الحرية بسمع ان الولد يبوس البنت حرية.. انك تكون مناضل شعبي وتنادي الديمقراطية حرية .. انك تشتم في الدولة حرية.. انك تبقي الصبح مناضل سياسي وبتمشي في مظاهرات وتقف تعمل هتافات قدام نقابة الصحفين وباليل انت سهران بين البنات في الافتر ايت مثلا وسكران لدرجة انك فاقد الوعي حرية برضوا ..انك تفضل تجيب في سيرة الناس اللي رايحة واللي جاية وتنم علي ده وتقول دي بتعمل وتسوي هي برضوا حرية ..ان ما يعجبش الناس ان انا محجبة وبشتغل في الفن وكل الناس مش عاجبها وكل بيقنعني اني اقلع الحجاب هي برضوا حرية

انك تكون ملحد وانك تكون علماني وان تكون مسيحي وانك تكون بهائي او ملكش هوية اصلا هي برضوا حرية

انك تشتم وتسب في طوب الارض هي حرية

ماشي يا ناس خليني اقول ان ده معني الحرية من وجهة نظر الناس اللي لسه مش قادرة افهمهم

طيب في حاجة اسمها الدين وربنا وفيه ناس بتحترم ده جدا وفي ناس بتقدر الاحكام الاهية وفي ناس معتزة جدا بانهم عارفين ان في دين وان في ربنا

يمكن انا اول مرة اكتب نوت بس مهم اوي اني اقول ان الحرية مش معاناها بس الحاجات دي الحرية من وجهة نظري انك زي ما بتنادي بحرية الرأي وتحرير العقول من المعتقدات الخاطئة او الرجعية زي ما بيقولوا هو برضوا احترام اراء ومعتقدات الغير حرية

انا مسلمة وفخورة جدا والحمد لله رغم اني مش متبعة كل التعليمات بتاعت الدين كما انزلت ولكن بحاول اوازن حياتي الغريبة اللي انا عايشاها بشئ يحميني زي ايماني بربنا وبديني واكيد دي حرية

كل الناس بتهاجم اراء المسلمين بس لكن لو انت ملحد مثلا او ليك اي هوية اخري الناس تحترمك جدا وتقول عليك حر ولما الملحد يكون مناضل او مدون واتسجن يا لهوي دي قمة الحرية ولما الملحد المدون المناضل ده يشتم في الدين ويقول ( الى كل من احترم ذاته وارتد عن الاسلام ) في احد مدوناته يعني يبقي حر برده

مش فاهمة ليه الحرية لغير المسلمين ..ليه الحرية اني معرفش ان في ربنا او اعرف واعمل عبيطة.. ليه الحرية اني اشتم في الدنايات السماوية بس واحترم كل من لا دين له


من حقي كمواطن مسلم ولي عقل متفتح علي كل ما هو جديد ان اشعر بالحرية لي ولديني حتي لو اعتبرت ده من سمات قوانين الحرية ف لو الملحد حر يبقي انا كمسلمة حرة
وزي ما انا المفروض احترم انه ملحد هو المفروض يحترم اني مسلمة وليا دين مقتنعة بيه
ولو هو مناضل باسم الحرية ومدون ينادي عن الحرية او علماني او غير كده ومن المفروض ان احترم كل التيارات دي هو من حقة يحترمني اولا

ولا هما يشتموا فيا وفي ديني تبقي حرية ولو انا رديت حتي بالاعتراض ما تبقاش حرية

الحرية علي الاقل اننا نحترم كل حاجة علي حد سواء مش حاجات وحاجات
الامر ببساطة ... احترم حقى فأنت اخى , امنت بالله ام امنت بالحجر

مبقتش عارفة يعني ايه حرية بس بمعناها الواسع مش معناها المخنوق